Гузаштани айнияткунонӣ (барои шахсони воқеӣ)

Барои дастрасӣ пайдо кардан ба хизматрасониҳои давлатӣ, бояд 3 марҳиларо гузаред:

1. Дар замимаи IMZO худро бақайд гиред
2. Шахсан дар Маркази хизматрасониҳои давлатӣ (МХД) айнияткунониро гузаред
3. Пас аз ин, аз портали хизматрасониҳои давлатӣ истифода баред ва хизматрасониҳоро дастрас намоед

⚠️ Муҳим: бе гузаштани айнияткунонии шахсӣ дар МХД, дастрасӣ ба аксари хизматрасониҳои давлатӣ дар портал имконнопазир мемонад.

Дастури муфассал оид ба бақайдгирӣ дар замима дар дастурамали «Тартиби бақайдгирӣ ва воридшавӣ ба низом» дастрас аст.

Инчунин, Шумо метавонед ба Маркази хизматрасониҳои давлатӣ (МХД) муроҷиат намуда, бо кумаки корманди Марказ аз бақайдгирӣ гузаред.

Пас аз бақайдгирӣ бояд як маротиба шахсан ба Маркази хизматрасониҳои давлатӣ (МХД) биёед.

Чӣ бояд бо худ гирифт

• Асли шиноснома (паспорт)
• Нусхаҳо ва аксҳои шиноснома қабул карда намешаванд

Ба куҷо бояд рафт Маркази хизматрасониҳои давлатӣ (МХД), ки дар бинои Агентии инноватсия ва технологияҳои рақамии назди Президенти Ҷумҳурии Тоҷикистон бо суроғаи: шаҳри Душанбе, кӯчаи Беҳзод 47а ҷойгир аст.

Айнияткунонӣ чӣ гуна мегузарад (чӣ гуна амалҳо сурат мегиранд)

1. Гирифтани навбат

• Шумо ба МХД меоед;
• Талони электронӣ мегиред (барои хизматрасонии МХД - Гузаштани айнияткунонии кабинети шахсӣ) ва навбати худро интизор мешавед.

1. Санҷиши шиноснома

• Шумо шиносномаро ба корманди МХД месупоред;
• Корманд ҳуҷҷатро месанҷад.

1. Скан кардани шиноснома

• Шиноснома аз ду тараф скан карда мешавад;
• Маълумот ба таври худкор дар система пур карда мешавад;
• Корманд маълумотро бо шиноснома муқоиса мекунад.

1. Скан кардани рӯй (биометрия)

• Таҷҳизоти махсус рӯи Шуморо скан мекунад;
• Система тасвирро бо акси шиноснома муқоиса мекунад.

1. Анҷоми айнияткунонӣ

• Агар маълумот мувофиқат кунад, айнияткунонӣ ба охир мерасад;
• Аккаунти Шумо мақоми айнияткунонидашударо мегирад.

⏱ Раванд ба ҳисоби миёна 5 - 10 дақиқа вақт мегирад.

Пас аз бомуваффақият гузаштани айнияткунонӣ дар МХД амалҳои зерин иҷро карда мешаванд:

1) Корманди МХД равандро ба анҷом мерасонад. Ба аккаунти Шумо мақоми «Айнияткунонидашуда» дода мешавад.

2) Аз аккаунти IMZO бароед ва дубора ба он ворид шавед.

3) Пас аз воридшавии такрорӣ ба замимаи IMZO:

• ба бахши «Профил» гузаред;
• опсияи «Биометрия»-ро пахш кунед;
• санҷиши биометриро гузаред (рӯи худро скан кунед (селфи)).

4) Ҳангоми бомуваффақият гузаштани биометрия, равзана бо аломати сабз ва тугмаи «Идома додан» пайдо мешавад.

5) Пайдо шудани ин равзана маънои онро дорад, ки айнияткунонӣ бомуваффақият гузаштааст.

Пас аз ин, имкониятҳои пурраи система барои Шумо дастрас мегарданд.

Шумо метавонед:

• аз функсияҳои дастраси замимаи IMZO истифода баред;
• ба кабинети шахсии Портали ягонаи хизматрасониҳои давлатӣ ворид шавед;
• аризаҳоро онлайн пешниҳод кунед;
• хизматрасониҳои давлатиро дастрас намоед.

• 📱 Рақами телефоне, ки ҳангоми айнияткунонӣ дар МХД зикр шудааст, бояд бо рақами телефоне, ки ҳангоми бақайдгирӣ ва воридшавӣ ба замимаи IMZO истифода шудааст, мувофиқат кунад.
• Бе тасдиқи биометрия дастрасӣ ба хизматрасониҳои давлатӣ маҳдуд мешавад.
• Айнияткунонӣ як маротиба гузаронида мешавад;
• Гузаштани такрорӣ танҳо дар ҳолати тағйир ёфтани маълумоти шахсӣ ё мувофиқи талаби мақоми ваколатдор талаб карда мешавад;
• Айнияткунонӣ ҳангоми ҳузури шахсии аризадиҳанда амалӣ карда мешавад;
• Истифодаи нусхаҳои шиноснома иҷозат дода намешавад.

Оё лозим аст, ки айнияткунониро такроран гузарам?

Не. Айнияткунонӣ танҳо як маротиба гузаронида мешавад.

Оё метавонам айнияткунониро онлайн гузарам?

Не. Айнияткунонӣ танҳо шахсан дар МХД гузаронида мешавад.

Оё метавонам бе шиноснома биёям?

Не. Доштани асли шиноснома ҳатмист.