29–30 сентябри соли ҷорӣ дар шаҳри Душанбе Форуми байналмилалии технологӣ — TAJ-TECH 2026 бо ташаббуси Агентии инноватсия ва технологияҳои рақамии назди Президенти Ҷумҳурии Тоҷикистон баргузор гардид. Форум барои муаррифии пешрафтҳои технологии кишвар, табодули таҷриба ва таҳкими ҳамкориҳои байналмилалӣ замина фароҳам овард. Мавзӯъҳои асосии форум хизматрасониҳои рақамии давлатӣ, зеҳни сунъӣ, амнияти киберӣ, инфрасохтори рақамӣ ва дастгирии лоиҳаҳои инноватсионӣ буданд. Ба ҷалби сармоягузорӣ ва таҳкими шарикии байни бахшҳои давлатӣ ва хусусӣ таваҷҷуҳи махсус зоҳир гардид.

Дар доираи форум, 30 сентябр, ҶСК «Марказҳои тасдиқкунанда, хизматрасониҳои давлатӣ ва таҳияи барномаҳои рақамӣ» бо ҶСК «Тоҷиктелеком» ва ширкати ватании IT Ayon Solutions ёддоштҳои тафоҳум ба имзо расонид.

Ёддошти тафоҳум бо ҶСК «Тоҷиктелеком» таҳияи муштараки барномаҳои рақамӣ, татбиқи лоиҳаҳо бо истифода аз зеҳни сунъӣ ва технологияҳои абрӣ, ҳамкорӣ дар самти ҳифзи маълумот ва баланд бардоштани иқтидори касбии мутахассисонро пешбинӣ менамояд. Ёддошти тафоҳум аз ҷони роҳбарон — Ҷамшед Шарипов ва Бахтовар Абдусатторзода ба имзо расонида шуданд.

Дар ин раванд, ҳамкорӣ бо Ayon Solutions ба рушди қарорҳо дар самти идоракунии электронии захираҳои инсонӣ ва гардиши рақамии ҳуҷҷатҳои захираҳои инсонӣ равона гардида, таҳия ва татбиқи барномаҳо барои автоматикунонии равандҳои захираҳои инсонӣ, гузариш ба ҳуҷҷатгузории электронӣ ва содда намудани фаъолияти воҳидҳои захираҳои инсониро дар бар мегирад.

Ёддошти тафоҳум аз ҷони роҳбарон — Ҷамшед Шарипов ва Абубакр Бобоев ба имзо расонида шуданд. Ёддоштҳои тафоҳуми баимзорасида барои таҳия ва татбиқи муштараки барномаҳои рақамӣ имкониятҳои нав фароҳам оварда, ба ташкилотҳо дар рақамикунонии равандҳои корӣ мусоидат хоҳанд намуд.